Le Manusheski Tragedija – Eftato rang

(Ando Konshtantinapoly. Forro unyi citojenonca. – Mashkaral le majbare rashajeski (Patriarka) dyiz, pej chachi rig e rashajkinnyango kher, po stungo rig luludyengi bar. O Adam sar Tankred, vityazi ternoj, e majbute kaver vityazencaj, anda Azhia palpale resline ketanengo prezidentoj, flako mishkindes avel, muzhika del duma pasha leste, o Lucifer sar lesko shovengari. Telaj ratyij, majpalal ret.)

ANGLUNO CITOJENO
Eta, avel ek turbato grupo.
Nashas, phandavas andre le vudara,
Tena te chorkeren amen pale.

DUJTO CITOJENO
Te zhantar le zhuvlya, ke le turbata
Pinzharen le lubiharengi zangar.

ANGLUNO CITOJENO
Taj vi amare zhuvja, o lashimo.

ADAM
Tordyon, so nashen kade, anglamende;
Vaj chi dikhen kado sunto somno,
Savo phralikanes kethane phandel? –
Amari pattyaki luma ingredam
Andej Azhija, kamipeski sityar,
Ke e milji turbata, ande save sar,
Sunto pato, mishkilas amari patyiv,
Taj mashkar tume chi avlas kamipo?

ANGLUNO CITOJENO
Ashundam aba kasavi vorba,
Taj pe amaro kher e ger hural. (Zhantar.)

ADAM (kaj e vityaza)
Ake, dikhen, kadoj armajaslo
Frutoj, kana khancheske gindosa
Si sunto flakko so vazdel,
Taj bi tromatar kerel pe le
Manushenge, bi akhardes pizdelpes
Prezidentoske. Vityazonale!
Inke uzhij e patyiv, Devlesko
Sunto lasharimoj, la zhuvlyako
Ferope, taj vityazipe avla
Pe amaro xanro, ame sam kodal
Kon e rutonen astaras, taj ingras,
Peske doroske te kerel baro.

LUCIFER
Shukares vorbis Tankred, apol maj
Tena patyana ke prezidento san. – –

ADAM
Kaj e godyi si, kothej e zor.
Telepizdav –

LUCIFER
Haj godyi te avla vi les?
Tele hurasa leste?

ADAM
Soste te hurav tele?
Haj na maj platnikoj lest te vazdav. –
Tele te phenav pa zorinesko than
Amala iva si inke cinimatura,
Tang kolyin, amales, chi mukel andre.
Ke sunuj e rig, ando trajo potyin.

LUCIFER
Ake, ake, sar cinosajlas o
Baro buzho, anda sost mule but
Zhene. Kado jekheskej slobodijaj? – –
Axtomakoj kado phralipe. –

ADAM
Na prassama. – Oh, na pattya, ke e
Lashar chi xutyilav opre. Mure
Trajosko dorojlo. Shaj shol, taj te shol,
Ande kast sunto jag si, kon opre
Zoril amende, jilesa zhukaras les.
Jek xanresko shinipe vazdeles.
Ta sama las, pe vorta patyiv.
Misto vi andaj vrazdini chingar,
Ta te avlas aba, te avlas vrama,
Amari muntuja atunch pherdyola,
Te perla tele zido, ke uzhoj sogodi.
Ba, na pattyav, ke kasavo dyes avla,
Ke kodo kon bari butyi kerdas,
Ichi na o Del avilo. –
Mure amala, dikhle, sar patyindema.
Geres, mashkar chingaresko foro.
Naj palal kaver, sar ande e bar
Te zhas, sar sityile te keren
E bi Devleske. Zhi po lasho boldel.
Zhan, vi me zho, palatume, sako
Vityazi te lel sama po nepeto.
(Le trushulale ketani vatra malaven.)

LUCIFER
Sosko bezex si, kaj tyo shukar buzho
Nyeves daravni phabaj bararel,
Kaj avral lolij, andral prahoj.

ADAM
Tordyuv.
Haj chi pattyas ande khanchi shukar?

LUCIFER
Vi tye pattyos, so moll, tyi fircija,
Chi pattyal, kado prajso vityazengo,
So tordyares anda Faros, ande o
Samudro, jokhar avri sovel, dopash
Perel, taj xasaripe avla e
Tromake manusheske, sar kaver
So chi abdyol, sar so ashtyin shordyol,
Vramasa merel, buzho huraltar,
O trupo perdal trajil, misto dugo,
Savo nasvajipe, mulikano,
Phurdel, andej nyevi luma, so krujal
Si. Dikhes kade ashol pe ame
O puranipesko barimo.

ADAM
Zhi amaro vorta kethane perel,
Shaj, o sunto sityar, ando butipe
Resel, taj atunchi naj xasar.

LUCIFER
Le sunci sityaripe. – –
Ah, ta o sunto sityar, si armaj
Sakana tumenge, kana chi kamles
Pe leste den, ke kattyi bolden les,
Vulunles, shinen les, kucinles,
Zhi dilyimo avla anda leste.
Vorta gindo, chi zhanel te inkrel
O buzho, tume inke sa kado
Roden, pe tumari armaj, phutyarde
Manushale. Vaj dikh o xanro, maj
Baro, maj cino shaj avel, chi moll
Kanch, kado shaj avel bi agoresko,
Taj kaj si o agor punto, savo
Kirara shola? Ichi tyi hatyar
Sigo peleste del, sar o baripe
Ande tordyol. Ba, so phagrav man, khinyil
E vorba, dikh tut, ekh pikko rispime.
(Unyi citojena pale angle aven.)

ADAM
Amalale! muro nepeto khinoj,
Muntume than mangel. Shajke ando
Trushulaslengo foro. Na mangel iva.

TRITO CITOJENO
Pushipe, dore na san
Maj nasul eretneko sar bi Devlesko.

SHTARTO CITOJENO
Phen, ta pattyas e anomes
Vaj e anomales?

ADAM
Kado chi hatyarav. –

LUCIFER
Na phen tut avri, tal bari butyi.

SHTARTO CITOJENO
Eta, chi patyal, xoxamno patyakoj.

BUTZHENE
Zhastar lendar, phandavas ame andre
Ando kher. Armaj pelest, kon than del. (Zhantar.)

(O majbaro rashaj krajikane shukarimasa taj gruposa avel andaj peski dyiz, ek grupo amal zhal palaleste eretna manusha ande vering, palal ketani, taj manusha.)

ADAM
Trestojma! – Ba phen, che baro sherutnoj
Kaj pashol kutka, kasavo phutyardes? –

LUCIFER
O majbaro rashaj si.

ADAM
Taj kadala punrangle prikezhiji,
Save loshan ande sastra mardenge,
Charde makhles zhan palalest?

LUCIFER
Trushulaslego-xoxavne amalgrupo.

ADAM
Nas kasave mashkar mure phure.

LUCIFER
Maj dikhesa palal; o bengipe, zhanes,
Lokhes barol. Ba, sama, na te azbas
Kadale inkrimaske taj anda kadi
Bi hodinake nepetos.

ADAM
Ah, sosko
Inkrimo si kasave nepeton.

LUCIFER
Lengo inkrimoj e sila, o tele
Phendimo, so Jezush sikadas po trushul.

ADAM
E jekh luma muntundas kadalasa
Ta kadal bi tromake numa Devles
Kushen, sar cicitora, shuden leski
Ashtyin. Kon po cincari shovengo
Ashtarel, so pej rish, vityazipej,
Diloj.

LUCIFER
Ta, hajkam von e cincares
Risheske dikhen. – Nashtig dikhen kade?
Najle zor ande pengo vityazipe
Kaj o beng te bishalen e lichomes? –

ADAM
Dikhav, sar o Tamash, taj chi pattyav. –
Andej jakha dikhav e sunenge. –
(Angla majbaro rashaj ushtyavel.)
Murodad! e suntone murmuntoske
Vityaza sam, taj pa khino lungo drom
Avas, le foroske, na den amen than. –
Tu baro san, zhutin amari traba.

MAJBARO RASHAJ
Muro shav, pel cine butya chi resav
Opre, o Del taj le manushengi
Traba, zhukarel man, pel eretna
Krisi shav, kon baron sar buraca,
Ichi shaj murdaras len, jagasa
Sastresa, o beng bishalel len pame. –
Dapol te sanle e trushuleske
Vityaza, soste roden dur e bax,
Kathej o trubato dushmano, opre,
Pe lenge gava, murdaren len,
Murdaren, zhuvlya, phures, shavoren.

ADAM
Ta bi doshales, dade, nashtig doros. –

MAJBARO RASHAJ
Bi doshaloj vi o sap, zhi cinoj,
Vaj kana avri peren leske dand,
Atunch na azbas les inke?

ADAM
Chaches bari bezex
Shaj sile, kaj pe kasavi xovlyi
Phabardas la khangerako kamipo.

MAJBARO RASHAJ
Shava!
Na kodo kamel, kon trupos del lipsa,
De kon o duho anel palpale,
Te trubuj, po xanro, pe jag, perdal
Kaj kodo, kon phenel:na miro,
Maripe anav pej phuv. Kaj nasula
And sunto tritopesko garady, sity,
O anomipe, sityaren zhi e
Khangeri anopalipeske
Kerel fundacija, le pattyameske.

AMALA
Merimo pelende, aba jag phabol. –

ADAM
Den opre, amale, kodo i,
Maj shukar postyin avla e shudine
Trajoske, anda sunto murmunto o marimo. –

JEK PHURO ERETNO
Benga, na zumav, ame anda chacho
Pattyav, kothe ratvajvas, kaj Del kamel.

O JEK AMAL
Ah, bi lazhavesko, and paty phutyarestu?

JEK PHURO ERETNO
Naj amenca le rashaja,
Taj aver but zhene?

O AMAL
Pe nasul drom reslas.
De andej Nicaea kaver chacho
Pasha amende tordyile?

O PHURO ERETNO
Le zhutora. – Che khancheski butyij,
Amenca te fugin. Vaj phen avri,
Si tumen barem jek rashaj, sar
Arius taj e duj Euseb? –

O AMAL
Ta kathar te sikavav ekhe Athanasiust?

O PHURO ERETNO
Kaj tumaro ratchachardo?

O AMAL
Majbut sar tumen.

O PHURO ERETNO
Shukar ratchacharde, saven o beng
Xoxavel, po bezexalo merimo. –
Phenav, tume san o baro Babilon,
Kodi lubnyi, pa kast, o sunto Janosh
Iskiril, savi xasajvela paj phuv. –

O AMAL
O efta sherengo sap, o beng kristo
Sanle tume, pa kast o Sunto Janosh
Vorbil, bur, xoxamne, bengeske, amal.

O PHURO ERETNO
Chor, sapa, bezexale, pohortyime…

MAJBARO RASHAJ
Ingren len, ingren, aba but si kathe,
Pe Develski lashar, pe jag lenca!

O PHURO ERETNO
Develski lashar, mishto phenes, benga,
Pe Devleski lashar perel merimo. –
Zurale sanle, keren pe tumari voja,
Lashoj so keren, chachimo, cheri del. –
Ginavel tumaro bezegchaso,
Anda amaro rat nyeve baron,
O buzho trajil, taj, jag, so lobbo del,
Luma pel shela bersh shudel. –
Aven, mure amala, po merimo. –

E ERETNEKURA (ande gruposte gilyaben)
Muro zuralo Del, muro zuralo Del, sostar muklanman, taj sostar durajlan kathar muro inkripe taj katharmure dukhange vorbi?
Muro Del, cipij, zhi kham tele del, tu chi ashunesman, chi ratyi naj man bezexipe.
Tu pale sunto san – – (XXII. zholt.)

E AMALA (gilyasa shinen andre)
Chingar, Raja, kon manca chingar kerel, taj martu pe muri rig – Vityazesa.
Astar shovengo taj feroja, taj ushtyi opre pe murozhutimo.
Taj le opre tyo tover, taj tordyar mure dushmanon-go drom. (XXXV. zholt.)

(Tela kadi vrama o Phuro rashaj taj o grupo zhantar. Unyi amal lilenca ando vast, mashkar le trushulasle zhan.)

LUCIFER
So tordyos bi vorbako, phen, so grozos?
Tragedijake dikhes? dikh numa
Komedijake, taj vojarela tut. –

ADAM
Oh, jaj, na pherasar! – ta andak i
Shaj zhan bi darasa ando merimo? –
Soj atunchi o baro o uchimo? –

LUCIFER
Kodo, so kavereske assamoj.
Jek thav ulavel e duj gindura,
Jek glaso numa so krisi shol
Mashkar ame, taj kado mujaloj o
Lasho, savo Devlisarel, vaj murdarel. –

ADAM
Sostar das ande mure jakha sa
E bezex! Ando zhanipe phutyardoj
O cino maripe. O merimo avri te
Lesa, anda maj axtome, maj shukar
Luludyi, inke maj fimlal. Pinzharos
Me, kadala luludya, kana inke
Nashade samas. Kon si doshalo?

LUCIFER
O doshalo si majzuralo,
Savo rispil, taj shel butya bararel.
E xasar, so kethane anel,
Vityazes del, zor, le eretnoncajlo. –

ADAM
Chaches, phandyaros muro xanro,
Taj palpale zhos, ando shilaslo them,
Kaj inke ande purane veshesko shajin
E mursheski patyiv, o uzho trajo
Chingarel turbecime vramasa,
Haj e garady vorba tena phenlas
Binach, ke kaj vrama si te nyevarav.

LUCIFER
Koli vorbaj. Ke ek zheno chikana
Chi mollpe ande sako vrama:
E vrama zhal, vaj ingrel, andre bolel,
Kon andre najol, naj prezento o zheno.
Kas bareske phenel e sirma
Sakon, kon moll, hatyarel peski vrama,
Ba chi kerel nyeve gindura,
Na pe bashneski vorba detehardyol,
Ba o bashno cipil kaj dereharaj. –
Kutka, kokol, kon andej lupunz, sigon,
Po merimo, krujal. prassasa sile
Dikhen ek manushani vurma angle,
Mashkarle uzhol nyevo gindyipe;
Taj anda kado meren, so lenge
Shavora opre pen, pej vulica. –
Ta mukas kado, dikh tyiri vatra,
So phir keren kodal melale amala,
Sosko foro keren, so vorbaren,
Dili vorba mashkar turbatu grupo. –
Ashunas len.

JEK AMAL (mashkar drukome trushulasle)
Vityaza, kinenle!
Kinen la jertojaki sityipe
Sikav kerel kana grozontume,
Kado sityarel o murdari,
O bezexako, o chor, o xoxamno,
Sode bersh pishtyija and rokovina.
Taj sityarel, hoj bershesheski robija
Hoj o barvalo shaj muntuj bish taj unyi,
Pune o choro trin krecarenca.
Taj kon te potyin na zhanel,
Unyi mija kanchikasa opre moll. –
Kinen kado patyivalo lil, kinen. –

LE TRUSHULASLE
Anta kathe. – Vi amenge, sunto dad! –

ADAM
Ah, nasulbikinari, maj nasul
Kinara. Cirde xanro, shin o foro!

LUCIFER (trestome)
Jertosar, ka rashaj dulmut amali
Mange, taj naj ruto mange kaj luma,
Le Devleski lashar vi te vazdas man,
Vi me opre lom man lesa.
Numa tu ashilan ek cerra tele.

(E Eva sar Izora, taj e Helene, kodolaki slugkinnya, vatyime nashen ka o Adam, unyi trushules kirestar, nashades, save, apol vi nashentar.)

EVA (kethane pelines)
Muntun man tu, vityazona.

ADAM (opre vazdines)
Trazontu, oh, rajkani zhuvlyi,
Kathe lashe thaneste san. Puter
Tye jakha. Sar phabon! Vaj so reslasle?

HELENE
Mishto hatyardam ame, kaj le kasht,
Ande amari shajinasli bar,
Bi gindo beshasas pe zeleno mal,
La shukara chiriklya ashunasas;
Sar dikhlam te abjon lake jakha
Turbune lipcasa pala o kasht.
Darasa lam te nashas, pune pala
Ame nashle, shtar trushulasle,
So, chi, resline amen, zhi tute reslam.

ADAM
Na zhanav, te doroj, opre te trazos;
Ta te mukesama, misto, anda sune?

Sar shaj avel trupo, kade keshajo,
Kasavo shukar taj kamipesko –

LUCIFER
Keshajano trupo! – Oh, o trajo
Chaches nashtig marlas feder
Kamades anda dilimo, sar ande
Pherdes sogodi, so anda skumpo kerel. –

ADAM
Kade seroj, sar te pinzharos tut,
Hoj kethane tordyuvasas angla Del.

LUCIFER
Pe sogodeste mangav tut, na bister,
Tyo kamipe sosko vojakoj
Dujenge, e tritoneske bi vojakoj.

ADAM
Opre dikhel – assal, oh, Devla najis!

EVA
Vityazo, sar te najisij, muntundan man?

ADAM
Na barvalo prajsoj, kaj vorba pe tyo muj?

LUCIFER (Kaj e Helen.)
Dosta kishlo prajsoj, taj me chi lav? –

HELENE
Taj sosko blagopesa kamav tuke?

LUCIFER
Ta tu kodo pattyas, ke o vityazi,
Vi tut muntundas? Soski pattyamnij.
O vityazi te muntuj la romnyora,
Vi o shovengari laka sluga.

HELENE
So mollosardomas. Vaj, blago, avo,
Taj kothe avo, sar reselma xasar:
Vaj bi blago, taj vi kade bezexaki. –
Dapol, nas zhungale le shtar mursh.

ADAM
Oh, zhuvje, kaj te ingrav tut, vladon.

EVA
Anglame tordyol dyizako vudar.

ADAM
La dyiza phenes? Oh, ta lako vudar
Chi phandavla anglama o doro, so?
De man ek somno, keciles po trushul,
Ke zhi ando kaver barimo
Akharel man, te anel muro suno,
Taj tena te rucima but bersh, te
Zhukarav. Pe sost, agor feril man. –

EVA
Ake, kaj dori. –

ADAM
Kadi sar ratyaki dorij? –
Oh, zhuvlye! bax, bax, na mila.

EVA
Muroj kado somno, nashtig dav kaver.
Mashkar la dyizako zido naj doro.

ADAM
Te chi kamipo. Thaj kaj tu san,
Sar tena, avlas, kamipo, shej!
Tyire gada sikaven, na san rashkinnya.

EVA
Na azbama tyire pushimatonca,
Taj azbasman te dikho mila petu. –

LUCIFER
Taj phandavla o zido vi tut?

HELENE
Ova, ba laki kija naj shudini.

LUCIFER
Baro bezex – ke brigaki pojeza
Ramojas, pa kaj mila. –

HELENE
Pujari, zha anglama!

LUCIFER
Ta sostar? Haj na baro buzhoj kana
Pala tyi kija zhav, tela samudro?

HELENE
Ah, kado china doroj.

LUCIFER
Aba zhav. –
La xarako beng, kucil dand pema.

HELENE
Av palpale, av, murdarel man dar –
Shav muri kija andej fejastra. -–

ADAM
Muk te zhanav avri tyiro anav,
Ando rudyimo te zhanav te phenav,
Ashtyin te mangav petu, kana tyo
Agoresko kalipe na ulaves.

EVA
Muro anav Izoraj. Haj tyiro,
Vityazina? Rudyimo, sheja, perel.

ADAM
Tankred som.

EVA
Tankred, ash Devlesa.

ADAM
Izora, oh, na mukh man kasavo sig,
Te zhasatar, armaja dav anav,
So po agor phendan majintig
Anglunes – skurto sas o minut,
Vi suneske, sar te kerav maj dur,
Te ashosa garady, taj chi zhano
Tyo trajo, shukares te khuvav? -–

EVA
Ashun, muro trajo.
Vi muro dad sunto murmuntosko
Vityazi sas. Pune pelest pele
Dushmana, vatyime, jagasa –
Phabarde leski vatra. Napra
Gindisardas pe slobodija, taj
Colaxardas la sunto Marjake,
Ke man, kon inke shejori simas,
Te muntujape, lake del man.
Voj muntusajlas, me sunto rudyimo
Pendem, taj colaxardem.

ADAM
Oh, suntona dej!
Tu truposares uzho kamipe,
Chi boldantu azbajimasa kathar
O bi sunto pattyajimo, desar
Pe tyo uzhimo bezexa pizdel,
Armajenca kathar o cheri. – –

HELENE
Haj tu, chi pushes pa muro trajo?

LUCIFER
Kodo aba zhanav: kamlan, xoxadyilan,
Kamlan pale, atunchi tu xoxadan.
Pale kamlan – tye vityazos rucindan;
Akanak tyo jilo, nyeves zhukarel. –

HELENE
Baro phenes! Shaj ke o beng si tusa?
Ta kasaveske napra pattyajlom tut,
Hoj muro jilo shusheske gindin.

LUCIFER (kaj o Adam)
Raja, sidyar. Tu chi zhanes tavestar,
Me pale na zhanav, te tordyarav bax.

ADAM
Izora! tyi sako vorba, pusav si
And jilo. Oh, zhuvje, chumidema.

EVA
Vityazi, so doros – ashundan colax.

ADAM
Ta kodo slobodoj, me te kamavtut.

EVA
Tu baxtalo san, ta sar bistrav tut me?
Tankred, zhav aba, nachol muri zor.
Ash Devlesa – dikho tut ando cheri.

ADAM
Zha Devlesa. – Pe kado dyes seroja. –
(E Eva andej dyiz zhal.)

HELENE (rigate)
Ah, bi tromako – sa me te kerav?
(opre) Andej fejastra avla e kija.
(Zhal pala Eva.)

ADAM (trazolpe)
Akanak, shaj zhas.

LUCIFER
Aba shaj zhas – gataj aba. –
Dikhes, kasavi dilij tyi fircija,
Maj pedokane dorosa dikhela
La zhuvja, taj phukle vastenca
Tele xosel, pojezosko praho,
Pa lako sham, pes chorela
Kathar maj kuch kamipeske luludya;
Maj Devlikanes po altari shole,
Taj ratvajvel andale, taj zoril
Iva, zhi chi shutyoltar laki chumid. –
Sostar chi dikhela, taj patyivila
Sar zhuvja. Ande lako zhuvlyanipe.
(Tela kadi vrama andre tunyardyilas, o shonut opre ushtyilas. Izora taj e Helene andej felyastraj.)

EVA
So dorosa, diklas pema, izdralas,
Ah, ka vityazi mursh, izdrajlas anglama
De o zhuvjanimo vladisardas –
Kathe merav, sar sunto postyin.

HELENE
Chudakoj taj diloj o zhuvjanimo!
Te shinela e diskrimina,
Turbecime nashel palaj e zang,
Patyiv pa o stato tele shinel,
Taj shudines andej chik tevelij.
Tena shindyoltar, vi pestar izdral,
Mukel te shutyol lako shukaripe,
Kaverestar taj pestar chorel e zang. –
Sostar na phirel mashkaral. Vaj so dosh
Si ek cino lashipe, ek cino, kamipe,
Patyivasa unyivar nashtig astarav.
Ichi, e zhuvlyi na buzhoj, numa pikkoj.

EVA
Helene, dikh avri, kathejlo inke?
Sar shaj gelosastar, kasavo sigo.
Numa jekhvar, te shaj ashunavles.

ADAM (kaj o Lucifer)
Dikta krujal, chi tordyol kaj fejastra,
Chi bishalel ek jakhali palama?
Numa jokhar, te dikhav, lako trupo –
Izora! Oh, na bunun kaj kathe som.

EVA
Sol duj zhenenge maj mishto avlas
Te zhasastar. O, shindo jilo, sigo
Sastyol, taj dukhal, pale te shinasles. –

ADAM
Chi daras, kade andej ratyi te dikhes,
Sar, baro jilo, kamipestar marel.
Te kamas, feri amenge naj slobodo?
Chi daras, ke lesko vrazhipo leltut? – –

EVA
Vi andema trajil kado, sar suno,
Savo shaj, anda cheri andas man
Pe kaj luma; pe balval, shukar
Gilji avel, dikhav, sakon assal
Phralikane chumidipesa, pala
Sako kasht, de amende, Tankred, chi vorbin. –

ADAM
Ta sostar, sostar! nasul zido tordyarel? –
Kon katyi but las kathar o pogano,
Depol, na zhanav, perdal te nakhav zido? –

LUCIFER
Apol na ferojles, buzho, vramako,
Maj zuraloj, sar tu.

ADAM
Ah, kon phenel kodo!
(Palal ek bari jag phabol.)

LE RASHAJA (giljaben dural)
Muntun muro duho, kathar le shovengura haj ka-thar o jekhto xamo, kathar e zhuklesko vast.
Muntusar man, kathar Levosko muj, haj kathar le jekhe shingaslendar, ashun man.
Phenav tyiro anav, mure dadeske shaveske; avenkethane, kade lasharav tut.

EVA
Jertosar, Devlam, amare bezexange! –

ADAM (palpale grozojpe)
Soski daravni giljij.

LUCIFER
Patoski giljij kodi.

ADAM
Sajek, tavel, me chi darav.
Anda tute sogodi kerav.

LE AMALA (dural giljaben)
– – te uraven man opre kushimasa taj lazhavesa, kon xojajvel pe mande.
Te vojin, te loshan, kon kamen muro chachimo; taj te phenen kodo, akanak taj sakana: Luvudyija le Devles, kon kamel pacha leske slugake.

(Opral, sar e giljara, ande gilji xutyilde, o Adam, kon kaj la dyizako vudar ushtyades, pale tordyilas, pe dyizako turno ek huljo cipil, ando ajero le choxanya huran, taj angla vudar jek kokalaslo trupo ushtyol andaj e phuv, taj daravel e Adamos.)

EVA (e fejastra ande phandavel)
Devla zhutin!

O KOKALUNO TRUPO
Zhatar kathar o sunto vudar.

ADAM
Kon santu, biuzhe!

O KOKALONO TRUPO
Me som, kon kothe avla
Ande tyi sako chumid, haj kamipe. –

CHOXANYA (asandes)
Guglo sumboro, shuklo fruto,
Tubanostar, sap, te barardyol.
Izora akharas tut!

ADAM
Che trupuraj!
Tume vrazhosajletar, vaj me?
Pinzharos tumen. Sar asanasle.
Soj o chacho, vaj soj kathe suno?
Pe tumaro vrazhimo kolyol o vast. –

LUCIFER
Bi kamles pelem mashkar skumpo grupo.
Dulmut zhukarav kadi bax, kado
Patyivalo, shukar, choxaj grupo,
Savo e nange gomes bi lazhavo
Tele mukeles, kado phuro bida
Amal, o zhungalo merimo, savo
Zhungarel e zor, taj rutjil kodo
E phuvake shavesa. San najisil.
Bezex ke chi resav opre
Mashkar tume ratyi te vorbisaras. –
(Le sikadyimatura nachontar.)
Tankred, opre, tyi skumpo phandadas
Fejastra; so tordyuvas andej ratyi?
E balval shudrij ta nasvajvesa.
E Helene pale avel, so kero?
Dore chi kamavelape o beng,
Asajimo avlas sakana,
Taj atunchi ingrelas o barimo. –
Bari kadi, o manush, tate
Kolyinesa pharrol, pala kamipo,
Taj numa mila resel. O beng, daba
Zhanel te muntujpe sigo.

ADAM
Inger man, po nyevo drom, Lucifer!
Marav man palaj sunci buzhe,
Haj araklom armaj, ando gindo,
Devles lasharen, manushen murdaren,
Taj o manush, sas, mure
Buzhe andre te pherel, maj lasheske
Kamlom amaro trajo, te shuvav,
Taj e bezex, shute po lashimo,
Vityazipe tordyardom, taj kado
Pizdas shuri ando jilo. Zhavtar,
Ande nyevi luma, rucisardom, hoj
Me, so mollma, zhanglo opre te avav,
Haj tele te phenav, bi lazhavo
Mukav muro than. – Tena duhima
Majbut khanchi, te mishkilpe e luma,
Sar kamel. Laki rota majbut chi
Mishkij. Dikho sar pereltar. Khinyilom. –
Te hodinij kamav. –

LUCIFER
Atunch hodinintu. Me daba pattyav,
Hoj, tyo buzho, kaj bi hodinaki zor,
Te hodinis mukeltut. Adam, avtar.

Nagy Gusztáv fordítása

(Folytatjuk)