Le Manusheski Tragedija – Angluni rang

ANGLUNI RANG

(Ande o cheri, o Raj luvudyijatar beshel, krujal ka skamin. Inzherongo grupo tordyon pel changa. Le shtar majbare inzherura pasha o skamin tordyon. Baro fimlalipe si.)

INZHERONGO GRUPO
Luvudyija amare Devleske,
Te ashareles e phuv haj o cheri,
Kon jekh vorbasa akhardas sogodes,
Taj leske dikhimostar si agor.
Voj si e zor, e godyi, intrego shuk,
Anda kado amen jek-kotor das,
Kamas les anda bari ashtyin, kaj
Ando fimlalipe rig das amen.
Trupusajlas biagor e idaja,
Eta, o arekhadyimo gataj aba,
O Raj sakonestar, kas trajo das,
Unyi taksha po sunto than zhukarel.

O RAJ
Gataj aba bari butyi, ova.
E mashina boldyol, o raj hodinyil.
But milli bersh phirel pej vosija,
Zhi jekh rota nyevardyi trubuja.
Ta opre, mura lumake ferolya,
Zhan tumaro drom, o biagoresko.
Vojil man, inke jokhar pe tume,
Sar bungantar tela mure punre.

(Le cherhajenge ferome buzhe kaver falo barej, jekhto, dujto cherhajoblura le mugjasle cherhajen nashaven, angla o skamin. Anda o cheri sunci gilja ashundyon, lokes.)

INZHERONGO GRUPO
Sosko phutyardo jag glonto avel
Kon ande pesko abdy lichomes,
Jekh slabo cherhaj-gruposke
Ichi, voj sklugil bizhanglo. –
Daba phabol kaj cini cherhaj,
Gindisas ke slabo memelij,
Inke milli zhuvindyipe sile
Andej biginadyi bari luma. –
Duj oblura maren jekhavres
Kethanes peren, shindyontar:
Kado maripe lashi tordy si,
Po drom, majdur te tradentar. –
Bungardes del tele kuko,
Dural darasa dikhes les:
Ande lesko brekk but trajo
Lel pacha, voja, haj but shuk. –
Sosko shukar avla kothe,
Cherhaja le kamipeske,
Ferin les grizhake vasta,
Loshake, le manushenge. –
Kothe rakhadyime lumi,
Kathe dukhipenge murmuncij:
Ferime vorbaj kon patyal
Le brigengiresko lashimos. –
Zangardes avel kutka le
Daramne moski cherhajin:
Trazo avla po bango drom,
Devleski vorba te ashunel:
Aves tu, skumpo terno buzho
Kaver lumake oblosa,
Kon kalipe haj abdyope,
Zeleno-parno gad paruves.
Kaver lumake oblosa,
Bari chereski ashty petuj!
Numa angle bi brigatar;
Pel granici bare buzhe
Avna, ande marimaste,
Ichi shuk haj zhung, asva haj ass,
Fimlo, shalin kethane avla:
Le Rajeski xovji taj voja.

(Le cherhajenge ferome buzhe geletar.)

GABOR MAJBARO INZHERO
Kon dan bi agor o ajero,
Dan materija andeleste,
Kon o baripe haj duripe
Pe jek vorba andas kethane:
Hozhana tuke, Buzhe! (Mujal delpe.)

MIHALY MAJBARO INZHERO
Kon o agor zhanel aver sar,
Haj o kaver sar jekhisares,
Bi agor haj vrama kerdes,
Jek zhenipes haj e vicovon:
Hozhana tuke, Zor! (Mujal delpe.)

RAFEL MAJBARI INZHERO
Kon baxtyamo shukar shoraves,
O trupo ande godyi anes,
Haj pasha tyiro platnikipe
Intregona luma ande les:
Hozhana tuke, lashimo! (Mujal delpe.)
(Nach.)

O RAJ
Haj tu Lucifer tordyos chi vorbis,
Pe muri Glorija naj so phenes,
Ta chi fajtu, kodo, so me kerdem?

LUCIFER
So te fajma? Kaj unyi materija,
Kaver-kaver butyancaj uradejle,
Saven, majanglal, china chi pushlan,
Shajke china chi zhanadan lenca,
Kade te si, pe kaver naj tut zor,
Ande unyi oblo kethane trokos,
Akanak cirdel, nashaven jekhavres,
Ande unyi kerme gindo ushtyavel,
Taj sogodi pherdyilas, shudrilas,
Haj ashola o nasul praho. –
O manush kado jekvar te dikhla,
Ande drabasli kinda kereles. –
Tu bari kinda des tye manushes,
Haj dikhes leske, kaj chi hatyarel,
Kiravel haj pes Devleske gindil.
Haj kana rumujales, shudel
O xaben, tunchi des pe xovlyi.
Apol so zhukares kaver lendar? –
Atunchi soste o arakhadyipe?
Pe tyi glorija iskiris poez,
Shutan len andek nasul mashina,
Haj chi rucis, pune luma, lumaj,
Kaj kodi gilyi sa kade zhala.
Perelpe kathar jek phuro kado
Khelimo, kastar numa terne tatyon?
Kaj ande trokome chik, zhar prassal
Rajes, haj numa zhung zhanel, muj na;
Merimo, skepija jekhavres azbal,
Haj naj jekhatyarimo ande godyi. –

O RAJ
Numa shero shaj bandyaren, na vorbi.

LUCIFER
Nashting dav tut kaver, numa so som.
(Po inzhero sikavel.)
Glorin tut dosta nasul grupura,
Haj vi perelpe, kaj von glorin tut.
Tu kerdan len, sar fimlo o shalind,
Apol, vi me trajil sakana.

O RAJ
Ah, bi mosko! Na chik sanas vi tu,
Kaj sas tut vareso, kaj sas tut zor?

LUCIFER
Kadala vi me shaj pushav tutar.

O RAJ
Me dulmut vrama kamav te avel,
Ande mande trajlias, so kerdem.

LUCIFER
Chi hatyares shushipo andej ashtyin,
Kaj mashkar sako trajo zido si
Haj tu, sas te zhuvindis andalest?
Lucifer sas koj zidosko anav,
Kon la tagake phuri ashtyin si. –
Maj vojniko san, ke muro agori
Kodo, te maroma, te xasaro,
Apol nyeva zorasa te ushtyav.
Tu materi kerdan, me vrama lem,
Pasha trajo kothe o merimo,
Pasha kamipe o na kamipe,
Abdy pasha shalind, baxt haj briga. –
Sa kothe tordyuvav, dikhes, kaj tu,
Haj kaj kade pinzharav tut, bandyuvo?

O RAJ
Haj, dushmano buzho! Zhatar mandar,
Shaj nacharos tut, numa chi kerav,
Nashavav tut anda sako ashtyin
Zhuvin ando praho, ruto, strejno.
Haj ande tyo shudro korkoripe
Te azbaltu bi agoresko gindo:
Ke iva, kinos, tyo prahaslo vering,
Tyo vladipe cerraj, tye Rajeske.

LUCIFER
Na kade, bi phares, nashtig shudesman,
Sar kasava traba, so na: trubuj. –
Kethane zhuvindisardam: muro,
Mangav tutar.

O RAJ (prassavnes)
Tal kade sar doros.
Dik pe phuv, maskar le baxtale kasht,
Le duje shukare kashten mashkaral,
Armaja davle, kade tan tyire.

LUCIFER
Cini burnyik des, ke baro raj san,
Ta jek palmaki phuv dostaj mange.
Kaj e taga o punro tele shol,
Tyiri luma tele pashjarela. (Zhaltar.)

INZHERONGO GRUPO
Zhatar angla Del, armajadino,
Hozhana le Devles, kon kris shindas. –

(Nagy Gusztáv fordítása)