E romanyi rikonyi

Thud thaj varosko mucipe.
Mal phutrel lole luludyan.
Voj, vuneci drakha suvel
po galbeno phanri – poxtan.
Pej gloria memelyaki
eftachiriklyora huran.
Dural e khangeri bashol
phuro urso delpe mujal,
shukar suvel! Soski guglyi!
Vaj, te shaj zhanlas te suvel
kodo so ande pest gindyil,
po galbeno phanri – poxtan!
Mongolia thaj siminca,
dori kranga, cherhaj-vundya,
fosuj, shonut – po altari,
pe o phanri-poxtan huran.
Panzh phabaja andej kinda
Patyon ande gugle zuma,
le Kristoske panzh rat-dukha
Almeriaki kham-mugja.
Sunestar fimlan thaj phabon
la rikonyake duj jakha
duj pujarura si andre,
len lakó gad, denla mujal.
O duripe ucho kerdyol
sar zhan kale nuverura,
brumaki char, guglo jilo
shindyol pe la e rucija.
Vaj, dolma, oprune phuva
phabon bish svuntone khama!
Vaj, dromeske paja bashon
sarso mukhen le gindura!
Ba voj beshel.numa suvel,
luludya suven le suva,
e raza khelel pel sasira
andej balval, la lindrasa.

Choli Daróczi József fordítása